st bus - bike accident : एसटी चालकाची सावधानता, तरुणाचा जीव वाचला

- संदीप शेमणकर

राजापूर - राजापूर रेल्वेस्टेशनसमोरील उतारावर झालेल्या मोटर सायकल आणि एसटीच्या समोरासमोर धडकेत  तरुण गंभीर जखमी झाला. तरुणाला अधिक उपचारांसाठी रत्नागिरीला हलविण्यात आले आहे. मात्र एसटी चालकांच्या प्रसंगावधनामुळे मोठा अनर्थ टळला.

राजापूर आगारातून सकाळी ८.३० वा. राजापूर व्हाया रेल्वेस्टेशन फुपेरे ही फेरी चालू आहे. चालक प्रकाश दुईके ही एसटी फेरी (एमएच १४ बीटी २९७५) घेऊन शुक्रवारी सकाळी रेल्वेस्टेशनला जात होते. दरम्यान सोल्ये येथील तरुण गिरीश सौंदळकर हा मोटर सायकल घेऊन ससाळे येथील दवाखान्यामध्ये जात होता. सोल्ये पेथील उतारावर एसटी आली असता समोरुन येणारी एसटी पाहून सौंदळकर याचा गाडीवरील ताबा सुटला. सुमारे १० फूट मोटर सायकलवरून फरफटत जात सौंदळकर एसटीवर जाऊन आदळला. एसटी चालक दुईके यांच्या हे लक्षात येताच त्यांनी एसटीचा वेग कमी केला आणि बस गटारामध्ये उतरवली. दरम्यान सौंदळकर हा एसटीवर आदळून एसटीच्या खाली गेला. एसटीचा वेग कमी केल्यामुळे सौंदळकर एसटीच्या मागील चाकाखाली जाता जाता वाचला. अन्यथा मोठा अनर्थ घडला असता. बसवर आणि जमिनीवर आपटल्याने सौंदळकरच्या डोक्याला गंभीर दुखापत झाली.

अपघाताची माहिती समजात येथील रिक्षा व्यवसायिक आणि ग्रामस्थांनी त्वरित घटनास्थळी धाव घेतली.  ग्रामपंचायत सदस्य रमेश सांदळकर आणि त्यांच्या सहकाऱ्यानी गंभीर जखमी झालेल्या सौंदळकर त्वरित रत्नागिरीला हलविले.