st workers :  एसटीच्या सफाई कर्मचाऱ्याचा प्रामाणिकपणा

 - संदीप शेमणकर

ठाणे -  हल्ली प्रामाणिकपणा कमी झाला असल्याची चर्चा होत असतात, दुसरीकडे एसटीच्या एका सफाई कर्मचाऱ्याचा प्रामाणिकपणा समोर आला आहे.  शुक्रवारी १९ जुलै २०२४ रोजी मध्यरात्री कोल्हापूर - ठाणे ही एसटी प्रवाशांना वंदना एसटी स्टँडवर सोडून आगार क्रमांक २ येथे उभी करण्यात आली.

दैनंदिन कामाचा भाग म्हणून प्रवास करुन आगारात आलेल्या गाडीची सफाई कर्मचाऱ्याकडून साफसफाई केली जाते. ठाणे आगार क्रमांक २ येथील सफाई कर्मचारी मोतीलाल राठोड सदर गाडीची सफाई करत असताना गाडीत मिलिंद साळवी या प्रवाशाचे पैशाचे पाकीट पडल्याचे आढळले. सदर पाकिटात ३ ते ४ हजाराची रक्कम आणि महत्त्वाची कागदपत्रे होती. मिलिंद साळवी यांचे पैशाचे पाकीट सफाई कर्मचारी मोतीलाल राठोड यांनी त्यांना संपर्क करून परत केले आहे. सफाई कर्मचारी मोतीलाल राठोड यांच्या प्रामाणिकपणाचे कौतुक होत आहे. सदर प्रवाशाने याबाबत सफाई कर्मचारी मोतीलाल राठोड यांचे आणि लालपरीबाबत कृतज्ञता व्यक्त केली आहे.

तीन ते चार हजार ही काही फार मोठी रक्कम नाही, मात्र एसटीतील कर्मचाऱ्यांचा पगार पाहाता सफाई कर्मचाऱ्यांसाठी ही मोठी रक्कम आहे. मोतीलाल राठोड पाकिटातील पैसे सहजपणे ठेऊ शकले असते. मात्र त्यांनी या मोहाला बळी न पडता आपल्या प्रामाणिकपणाची प्रचिती देऊन जनमानसात लालपरीची प्रतिमा उंचावण्याचा प्रयत्न केला. त्यांच्या या प्रामाणिकपणाचे सर्वच स्तरातून कौतुक होत आहे.