घाटकोपर होर्डिंग दुर्घटना, आरोपीला उदयपूरमधून अटक

घाटकोपर दुर्घटनेतील आरोपीला अटक

मुंबई - घाटकोपरमधील पेट्रोल पंपावर जाहिरात फलक कोसळला होता, या दुर्घटनेतील आरोपी भावेश प्रभुदास भिंडे (५१) याला उदयपूर येथून अटक करण्यात गुन्हे शाखेला यश आले आहे. आरोपीला एका रिसॉर्टवरून अटक करण्यात आली आहे.

जाहिरात फलक कोसळल्यानंतर लगेचच भिंडे याने अटकेच्या भीतीने पळ काढला.  मुंबई पोलिसांचे पथक त्याच्या मुलुंड येथील घरी पोहोचले. पण तो पसार झाला होता. पोलिसांना त्याचे शेवटचे ठिकाण लोणावळा असल्याचे समजले त्यानंतर पोलिसांचे पथक तेथे पाठवण्यात आले. मात्र तो घटनास्थळी सापडला नाही. त्याचा मोबाईल बंद असून त्यानंतर त्याचा कोणताही थांगपत्ता लागला नाही. लोणावळा येथून तो राजस्थानमध्ये पळाला. अखेर भिंडेला उदयपूर येथील रिसॉर्टमधून अटक करण्यात आली.

भिंडे यांनी  २००९ मध्ये अपक्ष उमेदवार म्हणून निवडणूक लढवली होती. तसेच महापालिकेच्या परवानगीशिवाय फलक लावल्याप्रकरणी त्याच्यावर २१ वेळा कारवाई करण्यात आली होती. याशिवाय दोन वेळा निगोशिएबल इन्स्ट्रुमेंट्स कायद्या अंतर्गत त्याच्याविरोधात खटले दाखल होते. यापूर्वी २४ जानेवारीला मुलुंड पोलीस ठाण्यात भिंडे यांच्यावर बलात्कार आणि विनयभंगाचा गुन्हा दाखल करण्यात आला होता.

मुलुंडचे वरिष्ठ पोलीस निरीक्षक अजय जोशी यांना याबाबत विचारले असता त्यांनी भिंडेवर बलात्काराचा गुन्हा दाखल असल्याचे सांगितले. याप्रकरणी मुलुंड पोलिसांनी यापूर्वीच आरोपपत्र दाखल केले असून मुंबई उच्च न्यायालयाने अटकपूर्व जामीन मंजूर केला आहे.