कसिनोचा खेळ जीवावर बेतला

कसिनो खेळातून आर्थिक नुकसान, तरुणाची आत्महत्या

कसिनोचा खेळ जीवावर बेतला

मोबाईल कसिनो खेळताना आर्थिक नुकसान 

राजापुरात  तरुणाची आत्महत्या 

-संदीप शेमणकर

राजापूर : मोबाईल कसिनो खेळातून मोठे नुकसान झाल्याने आलेल्या नैराश्येतून राजापूर शहरातील एका ३७ वर्षीय  तरुणाने विषारी द्रव्य प्राशन करून आपलं जीवन संपवल्याची घटना मंगळवारी रात्री घडली . विक्रांत विठ्ठल देसाई असं मृत तरुणाचे नाव असून तो शहरातील एक व्यावसायिक होता .

विक्रांत उर्फ राजा देसाई याला मोबाइलवर कसिनो खेळण्याचा नाद होता . त्यातून त्याला  मोठ्या प्रमाणात आर्थिक फटका बसला. मंगळवारी सायंकाळी तो अनेकांना राजापूर शहरात फिरताना दिसून आला होता.  मात्र  त्यानंतर तो सापडत नसल्याने मित्रपरिवारासह घरच्यांनी शोधाशोध सुरू केली. त्याच्या मोबाईलवर सातत्याने संपर्क करण्याचा प्रयत्न केला, मात्र तो फोन उचलत नसल्याने सगळीकडे शोधाशोध सुरू होती . 

अखेर त्याच्या मोबाईल लोकेशनवरून त्याचा शोध घेण्याचा प्रयत्न केला असता तो रानतळे येथील एका हापूस आंब्याच्या बागेत मृतावस्थेत आढळून आला. याबाबतची माहिती राजापूर पोलिसांना देण्यात आली. पोलीसही घटनास्थळी दाखल झाले. त्यानंतर त्याच्या मृतदेहाचा पंचनामा करून शवविच्छेदन करण्यात आले.

ज्या ठिकाणी विक्रांत याने आत्महत्या केली होती त्या ठिकाणी सुसाईड नोट आढळुन आल्याची चर्चा सुरू होती . मात्र याबाबत राजापूर पोलिसांशी संपर्क साधण्याचा प्रयत्न केला असता राजापूर पोलिसानी याबाबत माहिती देण्यास नकार दिला.