जबरदस्त इच्छाशक्ती, मुंबई पोलिसांत भरती

संगमेश्वरची रूपाली गोसावी झाली मुंबई पोलीस 

इच्छाशक्तीच्या जोरावर केली अनेक अडचणींवर मात
मैत्रीण सुषमा रवंदे हिचे पूर्णपणे सहकार्य

रत्नागिरी - संगमेश्वर तालुक्यातील  किरबेट ओझरवाडी येथील एका गरीब कुटुंबामध्ये जन्माला आलेली रूपाली गणपत गोसावी हिची मुंबई येथे पोलीस शिपाई म्हणून नेमणूक झाली आहे. रूपालीचे आई वडील  शेतकरी आहेत. त्यामुळे तिच्या भावाने स्वतः न शिकता रूपालीला बारावीपर्यंतचे शिक्षण दिले. मात्र परिस्थिती गरीब असल्यामुळे तिला पुढचे शिक्षण घेता आले नाही. कुटुंबाला आपला हातभार लागावा म्हणून रूपाली मुंबई येथे नोकरीसाठी गेली.मात्र तिच्यातील हुशारी पाहून तिच्याच वाडीतील सध्या मुंबई येथे पोलीस दलात असलेली तिची मैत्रीण सुषमा रवंदे हिने रूपालीला पोलीस अकॅडमीमध्ये स्वतः फी भरून दाखल केले. पूर्णपणे  तिच्यावर लक्ष देऊन यशाचा मार्ग दाखवला. तसेच पोलीस भरतीच्या वेळी येणाऱ्या अडचणींवर मात कशी करायची, याचा सल्ला अशोक रवंदे यांनी दिला. तिच्या पाठीशी खंबीरपणे उभे राहिली. 

तसेच तिच्या भावानेसुद्धा पोलीस भरतीमध्ये लक्ष द्यावे म्हणून खूप मदत केली. सुषमा रवंदे अशोक रवंदे व माझा भाऊ यांच्यामुळे मला हे यश मिळाल्याचे रूपालीने सांगितले. रूपालीच्या यशाबद्दल ग्रामस्थांमधून अभिनंदन होत आहे.